السلام عليكم … وحياكم الله من جديد في المدونة بعد انقطاع دام طويلا جدا ..

ندخل في موضوعنا اليوم وهي دردشة خفيفة معكم اتكلم عن موضة الهواتف الذكية (Smart Phone)

ظهرت في الآونة الأخيرة هواتف ذكية بكثرة في السوق، وصار أول ماصار جهاز الايفون وهو بصراحة غير نظرتنا عن وش معنى هاتف أو موبايل بتطبيقاته وكل الأشياء والبرامج الموجودة اللي اعتقد لو استخدمناها بشكل صحيح راح تضيف لحياتنا الشي الكثير …

المهم والأهم هو وهذا الي جالس اشوفه من بعض الشباب والشابات في السعودية ويمكن في الوطن العربي ، يشترون هالأجهزة بس لأنه صديقي اشتراه أو ولد عمي عند جهاز وأنا لازم يكون عندي واحد…

مثلا سالفة البي بي ( بلاك بيري ) هو أصلا صمم لقطاع الأعمال وهو راح يفيد الموظفين مثلا في التواصل مع العملاء بالايميل أو غيره..  بس الي نشوفه أنه الصغير قبل الكبير يمسك هالجهاز ( وين دور الأب والأم) .

وسوق الشرق الأوسط بصراحة مطمع لكل مصنعي الأجهزة لأنه السوق ماشي مدام فيه ناس تشتري وتتبع التيار وبدون ما أفكر ولو للحظة . وش هي احتياجاتي ، ماهي ميزانيتي وغيره من الأسئلة الضرورية

وزي ماسمعتوا في الايام القليلة الماضية عن جوال قوقل نيكسس ون ودعاية قوية كانت منتشرة في جميع مواقع التقنية وأيضا موجودة مقارنات كثيرة بينه وبين الايفون ( لكل جهاز له أنصاره ومعارضوه). بس أحب أركز على نقطة وهي قبل لا اشتري الجهاز اسأل عن الجهاز والخدمات المقدمة بعد البيع والضمان وأسعار البرامج إذا كانت بفلوس وهل راح يلبي كل احتياجاتي أو لا .

يعني ماكنا نسأل في المنتديات ونسأل أصدقائنا قبل لانشتري اللاب توب، لازم نسوي نفس الشي في الاجهزة الذكية (لأنها صارت حاجة ضرورية للبعض سواء في العمل أو الدراسة أو غيره من الاحتياجات الضرورية).

وفي استطلاع أو دراسة قرأتها في الانترنت تقول مثلا أنه 25% من الشباب مابين عمر 18 إلى 34 والي هم ماعندهم سمارت فون راح يشترون في أقرب وقت ممكن وبالتحديد في الـ 12 شهر القادمة.

ممكن تشوف هالمقال بالضغط هنا

الدراسة هذه في أمريكا وياليت نشوف دراسة في السوق السعودي وكم مثلا نسبة الشباب والبنات من يمتلكون أجهزة ذكية ومامدى استفادتهم منها وكم نسبة من يخطط أنه يشتري في الأيام القادمة ..

أخر شي أبي أقوله (( لاتشتري جهاز ذكي حتى تكون أنت ذكي في اختياركــ ))

Advertisements